Gipahigayon sa City Agriculture Office (CAgO) ang pag-apod-apod sa Crop Damage Financial Assistance nga nagkantidad og ₱1,804,905.00 sa Barangay Violeta Covered Court, Malaybalay City. Ang maong tabang gipondo gikan sa Disaster Risk Reduction and Management (DRRM) Fund aron suportahan ang 664 ka apektadong mag-uuma ug fisherfolks gikan sa 11 ka barangay nga nag-antus og kadaot sa ilang panginabuhian tungod sa flash flood niadtong Hulyo 8, 2026.
Naglakip sa mga nakadawat ang 393 ka rice farmers, 227 ka corn farmers, 39 ka high-value commercial crops (HVCC) farmers, usa ka cassava farmer, ug upat ka fisherfolks. Sa mubo nga programa sa wala pa ang pag-apod-apod, naghatag og mensahe sila si City Mayor Atty. Jay Warren R. Pabillaran, Councilor Alan Ryann O. Legaspi, ug CDRRMO Head Allan J. Comiso bahin sa kahinungdanon sa suporta sa gobyerno ug sa responsableng paggamit sa maong ayuda.
Gipatin-aw usab ni City Agriculturist Engr. Richard B. Leono ang mga patakaran ug proseso, diin gipahinumdoman ang tanan nga ang kantidad nga madawat sa matag usag usa nagdepende sa validated damaged area ug assessment. Bisan pa nga gigamit ang general computation nga ₱5,000.00 kada ektarya, magkalahi gihapon ang nadawat sa matag benepisyaryo.
Photo courtesy: LGU – Malaybalay City
