Nakaplagan nga wala nay kinabuhi ang usa ka 3-anyos nga batang lalaki human kini naanod sa sapa sa Sitio Santa Cruz, Purok 25, Barangay Casisang, Malaybalay City. Nahitabo ang insidente sa milabayng hapon diin nangayo og tabang ang 20-anyos nga inahan sa mga barangay tanod ug BPSO alang sa pagpangita sa iyang anak human kini mawala.
Sa pakighinabi sa Juander Radyo Malaybalay kang Barangay Kapitan Gregorio “Digs” Jaroy, nasayran nga wala sa panimalay ang inahan tungod kay anaa sa trabaho ug gibilin ang bata sa iyang lola. Nananghid ang bata nga mangihi duol sa sapa, apan wala nabantayan nga naanod na diay kini sa kusog nga sulog. Nakita ang bata nga naglutaw sa sapa ug dali nga gidala sa Provincial Hospital, apan gideklarar kini sa doktor nga dead on arrival.
Tungod sa maong trahedya, nagpahimangno ang kapitan sa Barangay Casisang sa tanang pamilya nga nagpuyo duol sa mga sapa nga magmatngon, ilabina sa mga panahong sige ang pag-ulan. Gihangyo usab niya ang mga ginikanan ug tigbantay nga hugot nga bantayan ang ilang mga anak aron malikayan ang pagpabaya ug mapugngan ang susamang insidente.
Photo courtesy: Kapitan Gregorio “Digs” Jaroy
