Nakapangawot sa ulo ang usa ka 32-anyos nga lalaki nga residente sa Culaba, Biliran human kini nadakpan sa hiniusang operasyon sa kapulisan tungod sa giingong paglapas sa Omnibus Election Code didto sa maong lungsod niadtong Huwebes sa buntag, Oktubre 8, 2026.
Gilusad ang pagdakop sa mga personahe sa Culaba Municipal Police Station, inubanan sa Biliran Provincial Police Office-Police Intelligence Unit ug Provincial Intelligence Team, diin gibase ang pagdakop sa naasoy nga lalaki sa warrant of arrest nga giisyu niadtong Oktubre 6, 2026 sa Municipal Circuit Trial Court Branch 37, 8th Judicial Region, Caibiran-Culaba, Biliran.
Nasayran nga ang kaso may kalabotan sa Section 74, in relation to Section 262 sa Omnibus Election Code o materyal nga sayop nga pagpahayag, nga nagpasabot sa paghatag og sayop o bakak nga mahinungdanong impormasyon sa mga dokumento nga may kalabotan sa eleksyon diin nadokumento ang kaso ubos sa Criminal Case No. CB-26-1217.
Sa pagkakaron, gidala na ang nadakpan sa Culaba Municipal Police Station alang sa dokumentasyon ug hustong pagproseso, sa dili pa itugyan ngadto sa korte nga nag-isyu sa warrant.
Photo courtesy: PNP BPPO
