Patay ang usa ka lalaki samtang kritikal ang iyang igsoon human sila gipusil sa wala pa mailhing mga suspek pasado alas-4:00 sa hapon niadtong Miyerkules, Oktubre 7, 2026, sa Purok 13, Barangay Dungos, Tulunan, Cotabato. Giila ang namatay sa alyas nga “Toto,” samtang ang iyang igsoon nga nasamdan giila sa alyas nga “Dondon.” parehong mga residente sa maong lungsod.
Samtang padayon ang pag-atiman sa nasamdan nga si Dondon, gisusi sa kapulisan ang mga impormasyon nga makatabang sa pag-ila sa mga responsable sa pagpamusil. Gani, wala pa mahibal-i sa mga otoridad kung pila ang mga suspek ug unsa ang ilang gigamit sa pag-atake.
Usa sa mga anggulo nga gitan-aw sa kapulisan, mao ang posibleng panagbangi nga may kalabotan sa trucking. Hinuon, wala pa kini makumpirma isip motibo sa krimen, busa padayon ang imbestigasyon aron masayran ang tinuod nga hinungdan ug posibleng tulobagon sa mga nalambigit.
