Gipasiugdahan sa City Government sa San Carlos ang unang Cooperative Days Celebration pinaagi sa ribbon-cutting ceremony sa City Hall Lobby, aron mapalambo ang mga produkto ug serbisyo sa lokal nga mga kooperatiba, niadtong nakalabay nga adlaw.
Gipangulohan nila ni Vice Mayor Christopher Paul S. Carmona ug SP Committee Chair on Livelihood and Cooperatives Gerardo W. Valmayor III ang pag-abli sa display sa mga produkto sa mga kooperatiba.
Gipakita sa kalihokan ang nagkadaiyang produkto sama sa salabat, tablea, suka, bugas, mani, abaca fiber bags ug La Fortuna Essential Products. Mi-apil sa display ang FCCT, QUICORIFACO, CARCC, SanCarGem MPC, DCCCO MPC ug Negros Teachers MPC.
Matud ni SCCCDC Chairperson Nanette L. Abuan, ang Oktubre gisaulog isip National Cooperative Month ug ang unang Cooperative Days nagtumong sa paghiusa sa mga kooperatiba ug pagpalig-on sa ilang kontribusyon sa lokal nga ekonomiya.
Giawhag usab ni Abuan ang mga opisyal ug miyembro sa mga kooperatiba nga nag-atubang og mga hagit sa pagdumala nga moduol sa SCCCDC alang sa tabang ug suporta aron mapalig-on ang ilang organisasyon ug mapadayon ang ilang panginabuhian.
Magpadayon ang selebrasyon pinaagi sa bloodletting karong Oktubre 6, tree planting sa Oktubre 9, ug culmination program sa Oktubre 10, nga maglakip sa Cooperative Quiz, Zumba, Larong Pinoy ug pag-award sa mga mananaog.
Photo courtesy: San Carlos City, Neg. Occ. -LGU Information Page
