Nadakpan sa kapulisan ang duha ka indibidwal, lakip ang usa ka Rank 7 Regional Priority Target List (RPTL) nga giilang si alyas “Eskie,” 57 anyos, usa ka utility worker ug usa ka High-Value Individual (HVI) nga giilang si alyas “Jerry,” 47 anyos, walay trabaho, atol sa gipahigayong buy-bust operation sa kapulisan ddito sa Barangay Cogon, Ormoc City niadtong nakalabay nga adlaw.
Nakumpiskar sa mga operatiba ang siyam ka transparent plastic sachet nga adunay puti nga kristal nga substansiya nga gituohang shabu, nga may gibug-aton nga gibana-banang 10.29 gramos ug gibanabanang kantidad sa merkado nga P69,972.
Gimarkahan ug giimbentaryo ang mga nakumpiskang ebidensiya sa lugar sa pagdakop, diha sa presensya sa mga suspek ug sa gikinahanglang mga saksi, subay sa balaod. Gipahibalo usab ang mga suspek sa ilang mga katungod sa konstitusyon subay sa Miranda Doctrine sa pinulongang ilang nasabtan.
Sa kasamtangan, gidala ang mga dinakpan sa kostodiya sa kapulisan alang sa dokumentasyon ug dugang nga proseso sa dili pa ipasaka ang mga kaso batok kanila tungod sa gituohang paglapas sa Sections 5 ug 11, Article II sa Republic Act No. 9165 nga giamendyahan sa Republic Act No. 10640.
Photo courtesy:OCPS1
