Misangpot sa planong pagkutlo sa iyang kaugalingon kinabuhi ang nahitabo kang alyas “Rose”, 34-anyos ug residente sa Brgy. Don Felipe Larrazabal, dakbayan sa Ormoc human sa nahitabong mainiton nga argumento tali sa iyang 40-anyos nga live-in partner nga si alyas “Jack”, didto sa ilang poluy-anan sa naasoy nga lugar pasado alas 12:40 ang takna sa kaadlawon niadtong nakalabay nga adlaw.
Sumala pa sa testigo nga si Andy, 30-anyos nga nagpuyo usab sa tapad nga kwarto sa maong balay, nalambigit sa mainiton nga argumento ang mag live-in partner gumikan na sa kwarta nga miabot usab sa selos. Gisulayan pa matud ni Andy nga badlungon ang duha tungod sa kaikog nga basin maka distorbo kini sa ubang nag-abang sa boarding house. Apan, sa iyang pagtalikod usa ngadto sa duha ka minutos ang milabay, nabatian na lamang niya ang buto sa pusil nga sa ulahi nasabtan nga usa ka improvised pen gun nga gigamit sa biktima alang sa plano nga pagkutlo sa iyang kaugalingong kinabuhi.
Nasayran usab nga dili lang kini ang unang higayon nga misulay sa pag hunos sa iyang kinabuhi ang biktima, tungod nisulay na usab kini kaniadto sa pag las-las sa iyang pulso apan dali kini nga natabang.
Human madawat ang report mahitungod sa insidente sa pagpusil sa kaugalingon, dali nga miresponde ang kapulisan sa Ormoc city police station 4 sa lugar sa panghitabo aron masuta ang tibuok kahimtang ug sitwasyon. Samtang, ang biktima dali usab nga gidala sa Gatchallian Medical Center alang sa hinanaling atensyong medikal.
