Gipahigayon ang school visitation ug awareness activity ang mga personnel sa M’lang Municipal Police Station, alang sa mga estudyante sa Tibao Elementary School sa Barangay Tibao, M’lang, Cotabato. Gipangulohan ang kalihokan ni PLT Heidi D. Divinagracia, Deputy Chief of Police, ubos sa pagdumala ni PLTCOL Realan E. Mamon, Chief of Police.
Lakip sa gihisgutan sa mga pulis ang Nihilistic Violent Extremism o NVE, pagpangdaog-daog o bullying, kaluwasan sa internet, pagpugong sa cybercrime ug uban pang isyu nga may kalabotan sa seguridad sa eskwelahan. Tumong niini nga mapalambo ang kahibalo sa mga estudyante ug madasig sila sa responsableng paggamit sa internet ug paghimo og husto ug luwas nga mga desisyon.
Gihatagan usab og gibug-aton ang panagtambayayong sa mga estudyante, magtutudlo, ginikanan ug kapulisan aron mapadayon ang malinawon, luwas ug maayong palibot sa eskwelahan. Ingon man, pinaagi sa hiniusang pagtinabangay, mas maprotektahan ang mga kabataan batok sa mga hulga ug sitwasyon nga mahimong makaapekto sa ilang kaluwasan ug kaayohan.
Photo courtesy: M’lang Municipal Police Station
