Naniguro ang National Food Authority (NFA) Zamboanga del Sur nga mapaayo ug mapadayon ang kalidad sa mga bugas nga gamiton alang sa buffer stocking sa probinsya.
Atol sa eksklusibo nga pakighinabi sa Juander Radyo News Team ngadto kang NFA Zamboanga del Sur Acting Branch Manager Rixon T. Velasquez, wala silay pili sa mga klase sa humay nga gipalit gikan sa mga mag-uuma, hinungdan nga pipila ka higayon adunay taas o mugbo nga grain sa bugas.
Segun ni Rixon, sa karon wala silay pili sa mga variety sa pagapaliton nga humay gikan sa mag-uuma, gawas na lamang sa red rice nga kinahanglan pa ug approval gikan sa NFA Central Office.
Giingon ni Rixon, hugot nilang gimonitor ang kalidad sa mga palay nga ilang ginapalit aron masiguro nga ang mga kini angay alang sa pagtipig ug mahimong mapuslan panahon sa panginahanglan.
Gipasiugda sa ahensya nga importante ang maayong kalidad sa buffer stocks aron masiguro ang pagkaanaa sa bugas nga mahimong ipagawas sa merkado kung gikinahanglan, ilabina panahon sa mga emerhensya o kalamidad.
Padayon usab ang NFA sa pagpalit og palay gikan sa mga lokal nga mag-uuma isip kabahin sa ilang buffer stocking program.
