Nabangga ang motorsiklo sa nakaparadang Fuel Tunker Truck nga miresulta sa kamatayon sa duha ka indibidwal ug usa ang angol, nga nahitabo pasado alas-4:40 sa kaadlawon, National Highway, Km 5, Barangay Luna, Dakbayan sa Surigao, Oktubre 7, 2026.
Sa inisyal nga imbestigasyon sa kapulisan, Nalambigit sa disgrasya ang unit black Yamaha Aerox motorcycle bearing Plate No. 691ZEX nga gimanehoan sa 17 anyos nga batan-on, taga Purok 4, Acean Heights Subdivision, Barangay Bonifacio, ning dakbayan samtang angkas ang duha (2) pa ka minor de edad, parehong molupyo sa nasangpit nga Barangay.
Sumala sa report, kusog ang dagan sa motorsiklo padulong sa Barangay Bonifacio sa dihang kalit kining misimang paingon sa wala nga bahin ug milahos sa pikas lane hinungdan nga mibangga sa naka-parking nga Fuel tanker truck.
Tungod sa kusog nga impact, grabeng naangol ang drayber ug duha ka backrider sa motorsiklo ug gidala dayon sa Caraga Regional Hospital. Apan ang drayber ug usa ka backrider gideklarang dead on arrival, samtang ang laing backrider padayon nga gi-atiman ug anaa na sa luwas nga kahimtang.
Padayon karon ang imbestigasyon sa kapulisan aron matino ang hingpit nga hinungdan ug mga responsibilidad sa maong aksidente.
