Nagpatuman og Canal Cleanup Drive ang lokal nga pagamhanan sa Isabel, Leyte isip kabahin sa pagsaulog sa ika-126 nga Civil Service Month, diin gipahigayon ang pagpanglimyo didto sa Osmeña Street, Market, Sto. Niño Street/Judge Castor Street, ug sa atubangan sa Mormon Church niadtong nakalabay nga adlaw,
Gitumong sa maong kalihokan ang pagmintinar sa kalimpyo ug kahapsay sa palibot, ingon man ang pagpalambo sa disiplina ug responsibilidad sa pag-atiman sa kinaiyahan.
Personal nga gibisita ni Mayor Bennet Pongos ang mga lugar nga gitudlo alang sa cleanup drive aron mamonitor ang pagpatuman sa kalihokan. Gisusi usab niya ang kahimtang sa mga kanal, merkado ug pantalan isip kabahin sa padayon nga pagmonitor sa kalimpyo ug kahapsay sa mga pampublikong lugar sa lungsod.
Niapil sa kalihokan ang Municipal Disaster Risk Reduction and Management Office (MDRRMO), Engineering Office, General Services Office (GSO), Business and Agriculture Office (BAO), Market Office, Municipal Environment and Natural Resources Office (MENRO), Traffic Office, mga kawani sa elektrisidad, Slaughterhouse ug Bantay Dagat.
Miapil usab sa kalihokan ang Public Employment Service Office (PESO), OIC BJ Alcantara, Market Head Florelyn Cabreros, ug MDRRMO Head Gerardo Embog.
Pinaagi sa maong inisyatibo, gipasiugda sa LGU Isabel ang kamahinungdanon sa kooperasyon ug aktibong partisipasyon sa mga kawani sa gobyerno sa pagmintinar sa kalimpyo sa komunidad, subay sa tumong sa Civil Service Month nga mapalig-on ang dedikasyon sa serbisyo publiko.
Photo courtesy: Municipality Government of Isabel
