Patay ang usa ka 39-anyos nga lalaki human gidunggab sa iyang 50-anyos nga kauban sa inom atol sa usa ka birthday party sa Purok 2, Palacapao, Quezon, Bukidnon niadtong nakalabay nga adlaw.
Subay sa imbestigasyon sa Quezon Municipal Police Station (MPS), nahitabo ang aksidente pasado alas-9:30 sa gabii samtang nagkainit ang lalis sa duha diin gihagit sa biktima ang suspek nga makig-away. Tungod sa padayong provocation, nikuha og kutsilyo sa kusina ang suspek ug gidunggab ang wala nga bahin sa lawas sa biktima, kinsa gideklarang dead on arrival sa Quezon Infirmary Hospital.
Misulay pa og ikyas ang suspek paingon sa iyang panimalay sa Purok 5 human sa hitabo, apan dali kining gipusasan sa nag-unang alert team sa Quezon MPS diin narekober usab ang kutsilyo nga gigamit sa pagpanunggab.
Sa kasamtangan, ang suspek ug ang nakumpiska nga ebidensya anaa na sa kustodiya sa Quezon MPS alang sa sakto nga disposisyon ug sa pagpasaka og angay nga kasong kriminal.
Photo courtesy: Quezon Municipal Police Station
