Nasakmit sa kapulisan ang kapin 50 gramos nga gituohang shabu nga gibanabanang nagkantidad og P340,000 ug nadakpan ang usa ka giila nga high-value individual o HVI sa buy-bust operation sa Purok Paglaum, Barangay 39, Bacolod City, alas-1 sa kaadlawon niadtong nakalabay nga adlaw.
Giila sa kapulisan ang suspek sa alyas “Lau,” 33 anyos, ulitawo ug walay trabaho, nga residente sa Purok Kawayanan, Barangay Cabug, Bacolod City.
Sumala sa Police Station 1 sa Bacolod City Police Office, nakadawat sila og impormasyon gikan sa usa ka confidential informant kabahin sa giingong pag-apil sa suspek sa illegal nga kalihokan sa droga sa pipila ka barangay sa siyudad.
Human sa validation ug monitoring, gipahigayon ang buy-bust operation nga misangpot sa pagkadakop sa suspek. Gawas sa mga sachet, narekober usab ang usa ka plastic bag nga adunay gituohang shabu ug uban pang mga butang nga giingong gigamit sa drug transaction.
Gibanabanang P340,000 ang standard drug price sa nakumpiskang gituohang shabu nga adunay gibug-aton nga kapin 50 gramos. Matud ni PBGEN Rudecindo L. Reales, Regional Director sa Police Regional Office Negros Island Region, magpadayon ang PRO NIR sa mga target ug lig-on nga operasyon batok sa illegal nga droga aron mapanalipdan ang seguridad sa mga komunidad. Ang operasyon kabahin usab sa gipakusgang police presence sa Bacolod City samtang ginasaulog ang MassKara Festival.
Photo courtesy: Negros Now Daily / Negros Weekly
