Nakompiskar sa Leyte Police Provincial Office (LPPO) ang duha ka improvised nga armas atol sa padayong implementasyon sa Kontra Boga Drive batok sa mga loose ug unauthorized firearms sa Abuyog ug Matalom, Leyte niadtong Oktubre 5, 2026.
Ang operasyon gipangulohan sa LPPO ubos sa direksyon ni Provincial Director PCOL Celerino M. Sacro Jr., pinaagi sa Abuyog Municipal Police Station (MPS) nga gipangulohan ni PMAJ Luis B. Hatton, Acting Chief of Police, ug Matalom MPS ubos sa pagdumala ni PLT Maverick Allan C. Canlas, Officer-in-Charge.
Sa Abuyog, usa ka homemade long firearm o shotgun ang personal nga giturn-over sa usa ka Barangay Chairman ug residente sa Barangay Tib-o ngadto sa Abuyog MPS alang sa hustong disposisyon. Samtang sa Matalom, usa ka homemade o improvised shotgun nga lokal nga gitawag og “sumpak” ang nadawat sa Matalom MPS gikan sa usa ka Barangay Kagawad sa Barangay Zaragosa. Ang maong armas, nga gibana-banang 17 pulgada ang gitas-on ug hinimo sa G.I. pipe, giubanan usab og usa ka bala nga 12-gauge/birdshot shotgun ammunition. Matud sa barangay opisyal, ang maong armas kaniadto giturn-over kaniya sa usa sa iyang mga konstituwente.
Ang duha ka armas gidawat sa tagsa-tagsa ka police station ug gibutang ubos sa kustodiya sa kapulisan alang sa dokumentasyon, hustong pagtipig ug tukmang disposisyon. Giila sa LPPO nga kabahin kini sa padayong implementasyon sa Kontra Boga ug community-based initiatives nga nagtumong sa pag-awhag sa mga residente nga boluntaryong moturn-over sa mga loose ug unauthorized firearms ngadto sa awtoridad aron malikayan ang ilang paggamit sa krimen ug uban pang ilegal nga kalihokan.
Photo courtesy: PNP LPPO
