Arestado ang duha ka lalaki samtang tatlo ka long firearms ang nakumpiska sa clearing operation sa Sitio Baguilan, Barangay Sigayan, Lambayong, Sultan Kudarat sang Oktubre 6, 2026.
Suno sa kapulisan, nakita sang mga clearing military personnel ang duha ka lalaki nga nagadala sang tatlo ka long firearms sa nasambit nga lugar. Ginkilala ang mga suspetsado sa alyas nga “Nonoy” kag “Samsam,” 35 anyos, pareho nga residente sang Barangay Sigayan.
Gin-aresto ang nasambit nga mga suspek matapos wala makapakita sang kinahanglanon nga dokumento para sa pagpanag-iya sang mga armas. Narekober man ang mga bala, magazines, bandolier kag handheld radio.
Gindala ang mga suspetsado kag ebidensya sa Lambayong Municipal Police Station kun sa diin magapangatubang ang mga nasambit nga suspek sang nagakaigo nga kaso sa paglapas sang Republic Act 10591, ukon Comprehensive Firearms and Ammunition Regulation Act.
Photo courtesy: PNP Police Regional Office 12
