Gipangulohan ni Cebu Gov. Pamela Baricuatro ang community immersion sa lungsod sa Consolacion aron madungog ang mga kasinatian ug panginahanglan sa mga teenage mother, ilabina sa pag-atiman sa ilang mga anak, pagpadayon sa edukasyon ug pag-access sa serbisyong panglawas.
Nakigpulong si Baricuatro sa tulo ka teenage mothers nga mipakigbahin sa ilang mga hagit ug pangandoy nga makabalik sa pag-eskwela. Giapilan kini sa Cebu Provincial Health Office, DOH Central Visayas ug ubang partner agencies.
Matud ni Dr. Nikki Baricuatro Catalan-Vizcayno, upat ka isyu ang mitumaw sa diskusyon, lakip ang kahibalo sa mga programa sa gobyerno, reproductive health information, family planning ug suporta sa edukasyon.
Gipahibalo usab sa mga opisyal sa panglawas ang mga batan-ong inahan bahin sa mga serbisyo sa gobyerno ug Alternative Learning System sa DepEd aron makapadayon sila sa pag-eskwela samtang nag-atiman sa ilang mga anak.
Kabahin ang kalihokan sa Provincial Health Leadership Development Program nga nagtumong sa pagpalig-on sa local health system ug pagsiguro nga mahatagan og tukmang suporta ang mga batan-ong inahan.
Photo Courtesy: Cebu Province
