Nagpasidaan ang Davao City Police Office o DCPO batok sa dili gusto nga pagpanghilabot, pagpangulitawo ug pisikal nga kontak sa mga pampublikong lugar, nga mahimong sakop sa gender-based sexual harassment ubos sa Republic Act 11313 kun Safe Spaces Act.
Kini human mireklamo ang usa ka 21-anyos nga babaye nga giingong gi-harass samtang nagsakay og “bao-bao”. Matud sa reklamo, gipangutana siya og personal nga mga butang, gisultihan nga gusto siyang mahimong uyab ug balik-balik nga gipangayoan sa contact number.
Gikataho usab nga gihikap sa respondent ang bukton sa babaye bisan wala kini mouyon, hinungdan nga iyang giduso ang kamot sa lalaki. Pag-abot sa iyang destinasyon, dali siyang nanaog ug midagan paingon sa ilang balay, sa wala pa niya ireport ang insidente sa kapulisan.
Gipahinumdoman ni DCPO Acting Director Col. Peter Bauzon Madria ang publiko nga respetuhon ang personal nga utlanan ug wanang sa matag tawo. Giawhag usab ang mga biktima ug saksi nga ireport dayon ang mga insidente sa pinakaduol nga police station, Women and Children Protection Desk o WCPD, barangay ug ubang awtoridad.
Photo courtesy: DCPO
