Gipatas-an sa National Food Authority (NFA) ang buffer stock sa bugas sa nasud isip pagpangandam sa posibleng epekto sa El Niño.
Matud ni NFA Administrator Dr. Larry Lacson, nagdugang na og mga bodega ang ahensya ug gipataas usab ang buying price sa palay aron masiguro nga igo ug mas daghan pa ang ilang mapalit nga humay.
Target sa NFA nga makapalit og hangtod 500,000 metric tons nga bugas hangtod sa katapusan sa tuig. Tumong niini nga mapataas ang base buffer stock sa nasud ug masuportahan ang mga programa sa gobyerno sama sa Benteng Bigas Program.
Sa pagkakaron, mokabat sa pito ka adlaw ang buffer stock sa NFA, nga ilang target nga ipataas ngadto sa 15 ka adlaw. Samtang kung apilon ang stocks sa mga panimalay ug traders, mokabat sa 75 ka adlaw ang national rice buffer stock sa nasud.
Photo courtesy: NFA
