Mobalik sa world stage ang Cebu-based nga PADS Adaptive Dragon Boat Team aron makigkompetensya sa 15th International Dragon Boat Federation (IDBF) Club Crew World Championships nga gipahigayon sa Hualien, Taiwan, gikan Agosto 29 hangtod Setyembre 6. Tumong sa koponan nga masungkit ang ilang ika-upat nga major world title ug makab-ot ang bag-ong world record sa short ug long-distance races.
Sumala kang JP Maunes, founder ug team manager sa PADS, usa ka dakong dungog alang sa team ang pagrepresentar pag-usab sa Pilipinas, ilabina sa Cebu, sa internasyonal nga kompetisyon. Mokabat sa 45 ka atleta ang dad-on sa koponan ngadto sa Taiwan, lakip ang mga abled paddlers ug mga atleta nga adunay disability. Makigkompetensya ang mga partisipante sa 200-meter, 500-meter, ug 2,000-meter races sa short boat ug standard boat categories. Mokabat sa 5,500 ka mga kompetidor gikan sa 22 ka nasod ang gibanabanang moapil sa kompetisyon.
Dili na bag-o sa world stage ang PADS, nga nakadaog na og tulo ka major world titles niadtong 2019, 2022, ug 2023. Apan labaw pa sa pagpaningkamot alang sa titulo ug rekord, giingon ni Maunes nga ang ilang dakong tumong ang paghatag og dungog sa Pilipinas.
Naglaum ang team nga sa kataposan sa kompetisyon, ilang mapataas pag-usab ang bandila sa nasod pinaagi sa pagkab-ot sa ika-upat nga world title ug pagbuak sa bag-ong world record.
Photo courtesy: PADS Adaptive Dragonboat Racing Team
