Gisugdan na sa Department of Agriculture (DA) ang soft launch sa duha ka data systems nga gitumong aron mas mapalambo ang pagdumala sa livestock industry sa Pilipinas.
Pinaagi sa Animal Management Information System (AMIS) ug Livestock Registry System (LRS) nga maghiusa sa administrative data gikan sa upat ka dagkong ahensya sa livestock sector. Lakip niini ang Bureau of Animal Industry, Philippine Carabao Center, National Dairy Authority ug National Meat Inspection Service.
Matud sa DA, pinaagi sa AMIS mas dali nang mamonitor ang produksyon, kahimsog, vaccination, presyo, supply ug demand, mga sakit, ug mga programa sa gobyerno. Ang LRS usab magsilbing master list sa mga kwalipikadong benepisyaryo sa Animal Competitiveness Enhancement Fund (AnCEF).
Sumala ni Agriculture Secretary Francisco Tiu Laurel Jr., ang mas maayong impormasyon makahatag ug maayong koordinasyon alang sa paspas nga pagtubag sa mga problema. Gilauman nga mas mapalapad pa ang data integration sa livestock sector, padulong sa mas komprehensibong paglusad sa sistema sa tuig 2027.
Photo Courtesy:Department of Agriculture
