Mokabat sa 12.8 porsiyento sa mga Pilipino ang giklasipikar nga nakasinati og nagkalain-laing porma sa kakabus o multidimensional poverty niadtong 2024, sumala sa Philippine Statistics Authority (PSA).
Base sa unang Multidimensional Poverty Index (MPI) nga gipagawas sa PSA, dili lamang kita o sweldo ang basihan sa pagsukod sa kakabus, kundili laikp usab ang kahimtang sa edukasyon, trabaho, panglawas ug nutrisyon, puy-anan, tubig ug sanitasyon.
Sa lebel sa mga panimalay, 12.4 porsiyento ang gikonsiderar nga nakasinati og multidimensional poverty, samtang ang national MPI score sa indibidwal nga lebel maoy 0.045.
Sumala ni Department of Economy, Planning and Development Secretary Arsenio Balisacan, gipakita sa MPI nga ang kakabus dili lamang sukdon base sa kantidad sa kita sa usa ka pamilya.
Matod niya, importante usab nga masuta kon ang mga Pilipino adunay igong access sa mga batakang serbisyo nga makatabang kanila sa panginabuhi nga produktibo ug adunay dignidad.
Gipakita sa datos nga ang edukasyon maoy usa sa labing dakong hagit, diin daghang mga hamtong nga 19 anyos pataas ang wala makahuman og high school.
Gikutlo usab nga dagkong problema ang kahimtang sa puy-anan, suplay sa tubig ug sanitasyon. Matod ni Balisacan, makatabang ang MPI isip dugang nga sukdanan sa kasamtangang pagsukod sa kakabus nga nakabase sa kita, aron mas klaro nga mahibal-an sa gobyerno kung asa labing dako ang panginahanglan ug asa dapat ipunting ang mga programa ug serbisyo.
Nahinumduman nga bag-o lang gipahibalo sa PSA nga mikunhod ngadto sa 9.7 por siyento ang poverty incidence sa nasud niadtong 2025, nga mao ang labing ubos nga lebel nga natala.
Taliwala pa niini, adunay pipila ka ekonomista nga nag-ingon nga kinahanglan gihapon susihon ug usbon ang sukdanan o poverty threshold nga gigamit sa pagsukod sa kakabus.
Padayon usab ang gobyerno sa pagpatuman og mga programa sama sa adult literacy, abot-kayang public housing, pagpalig-on sa produksyon ug distribusyon sa pagkaon, ug uban pang lakang aron matubag ang nagkalain-laing aspeto sa kakabus sa nasud.
