Nagpangedaron sa 12-anyos ang natala nga pinakabatang nabuntis sa Bukidnon diin miabot sa 4,719 ka kinatibuk-ang kaso sa teenage pregnancy ang natala sa Philippine Statistics Authority (PSA) alang sa tuig 2023 hangtod 2024. Giila ang mga dakbayan sa Malaybalay ug Valencia nga adunay pinakadaghang natala nga kaso sa tibuok probinsya.
Gikabalak-an pag-ayo ni Population Program Officer IV Emily Marie Estacio ang pagsaka sa mas batan-ong grupo nga nag-edad og 10 hangtod 14 anyos, diin misaka kini ngadto sa 135 ka kaso niadtong 2024 gikan sa 124 niadtong 2023. Giila nga nag-unang hinungdan niini nga mao ang kakulang sa paggiya sa mga ginikanan, impluwensya sa social media, ug peer pressure.
Aron mapugngan ang padayong pagtaas sa mga kaso, gipakusgan sa Population Development Bukidnon ang pagpahigayon og Adolescent Sexuality and Reproductive Health Education sa mga tunghaan. Giawhag usab ni Estacio ang tanang mga ginikanan nga mahimong mas aktibo sa pagpakigsulti, pagpaminaw, ug paggiya sa ilang mga anak sulod sa panimalay.
Photo Courtesy: PBS
