Nakaapekto na sa kapin 32.23 porsyento sa mga katubhan sa Davao del Sur ang usa ka peste nga gitawag og Red-striped Soft Scale Insect o RSSI.
Gitutokan kini sa Committee on Agriculture, Cooperative, and Non-Government Organizations sa 18th Sangguniang Panlalawigan atol sa ilang miting niadtong Agosto 28, 2026.
Gipangulohan ni Board Member Rey Aballe ang maong miting, uban si committee co-chair Board Member Shiela Cagas ug mga representante gikan sa Department of Agriculture XI, Sugar Regulatory Administration, Regional Crop Protection Center, Bureau of Plant Industry, mga kooperatiba sa mga mag-uuma og tubo, ug pipila ka mga departamento sa Kapitolyo.
Base sa mga rekord, naapektuhan sa RSSI ang mga tanoman og tubo sa Bansalan, Matanao, Magsaysay, Hagonoy, Kiblawan, Sulop, Malalag ug Digos City.
Tungod sa pag-atake sa peste, nakasinati og pagkunhod sa kita ang mga mag-uuma nga naapektuhan ang uma, tungod sa ubos nga kalidad sa mga tubo nga naani ug pagkunhod sa gidaghanon sa nahimong hilaw nga asukal.
Giplano sa komite ang pagpasa og usa ka lakang aron dali nga matubag ang problema sa peste ug matabangan ang industriya sa tubo sa probinsya.
Photo Courtesy: Philippine News Agency
