Migula nga ang kakulang sa parental guidance o paggiya sa mga ginikanan sa ilang mga anak maoy nag-unang hinungdan sa nagkadaghang kaso sa sayong pagkaburos sa mga batan-on sa lalawigan sa Bukidnon.
Sumala kang Emily Marie Estacio, Population Program Officer 4 sa Population Development Division sa Provincial Government Office, ikaduha sa hinungdan ang social media, nga gisundan usab sa peer pressure o impluwensya sa mga barkada.
Gipasabot ni Estacio nga tungod sa kabusy sa mga ginikanan sa pagpangita og panginabuhi para sa pamilya, usahay kulang na ang ilang panahon nga makig-istorya ug maggiya sa ilang mga anak.
Tungod niini, gihangyo sa opisyal ang mga ginikanan nga mohatag ug mogahin og panahon sa ilang mga kabataan aron masayran ug matubag ang ilang mga problema, kabalaka, ug panginahanglan.
Gipasiugda usab niya ang kaimportante sa lig-on nga komunikasyon sa sulod sa balay, ilabina sa mga batan-on nga nag-atubang og emotional struggles ug mental health concerns, aron ang pamilya gihapon ang ilang unang maduolan ug makasaligan sa bisan unsang problema.
Photo Courtesy:PGO – PopDev Bukidnon
