Napriso ang tigbantay sa mga piniriso nga giilang si alyas “Sony,” usa ka Jail Officer 1, minyo ug residente sa Barangay Baas, Palo, Leyte human kini masakpan ug nakuhaan og gituohang shabu sulod mismo sa Ormoc City Jail – Male Dormitory alas 10:20 sa buntag niadtong nakalabay nga adlaw.
Matod ni JCINSP Jimmy V. Topia, samtang nangaon ang mga jail officer, nakit-an sa kauban sa suspek ang usa ka pakete sa gidudahang shabu nga nahulog gikan sa iyang bulsa ug dayon kini gi-report kang Topia. Sa gihimong pagpangita sa suspek, nakuha pa ang usa ka tissue ug unom ka gagmay nga pinilo nga aluminum foil.
Gibanabana sa kapulisan nga moabot sa 2.34 gramos ang gibug-aton sa nakuhang gidudahang shabu, nga adunay kantidad nga kapin ₱15,912.
Samtang gipahinumdoman usab ni JCINSP Topia ang tanan nga walay lugar ang bisan unsang ilegal nga kalihokan sulod sa ilang han-ay, ug ang matag personahe sulod sa ilang buhatan gilauman nga magpabiling matinud-anon, disiplinado ug responsable sa pagtuman sa ilang katungdanan.
Segun pa niya, ang bisan kinsang personahe nga mapamatud-ang nakalapas sa balaod pagaatubangon sa tukmang proseso ug manubag sa iyang nahimo subay sa balaod.
Sa pagkakaron, gidala na ang mga nakuhang ebidensya sa Regional Forensic Unit 8 alang sa laboratoryong pagsusi, samtang ang suspek anaa na sa kustodiya sa Police Station 1 alang sa tukmang dokumentasyon ug disposisyon.
