Posibleng mosaka og hangtod sa Php2.25 matag litro ang presyo sa lana sa lokal nga merkado sunod semana tungod sa pagsaka sa presyo sa internasyonal nga merkado.
Base sa mga kalamboan sa presyo niadtong Huwebes, si Leo Bellas, ang presidente sa Jetti Energy, nagpahibalo sa mga tigbalita niadtong Biyernes nga ang presyo sa diesel gilaumang mosaka tali sa Php1.75 ug Php2.25 matag litro, samtang ang gasolina mosaka tali sa Php1 ug Php1.50 matag litro.
Gipasabot ni Bellas nga misaka ang presyo sa lana tungod sa pagbalik sa ‘geopolitical premium’ samtang mikunhod ang paglaom alang sa diplomatikong solusyon sa panagbangi tali sa US ug Iran ug sa normalisasyon sa paglawig sa Strait of Hormuz.
Matod ni Bellas, lakip sa mga hinungdan sa pagsaka sa presyo sa lana mao ang mga risgo sa suplay gikan sa Russia human sa mga pagkabalda sa pagkarga sa Black Sea, tungod sa mga kabalaka bahin sa kasaligan sa ‘sour crude’ nga gikuha isip kapuli aron pun-on ang kakulang sa suplay gikan sa Middle East.
Dugang pa ni Bellas, ang nagpadayon nga mga aksyong militar sa Middle East maoy nag-unang hinungdan sa pag-usab-usab sa presyo sa lana tungod sa pagkunhod sa ‘crude feedstock’ nga mogawas sa Strait of Hormuz ug pagkabalda sa agianan sa Red Sea, bisan pa man nga ang dugang pagsaka niini gipugngan sa mas daghang suplay sa rehiyon gikan sa nagkadakong gidaghanon sa lana nga gipadala sa India ug China.
Photo Courtesy: Philippine News agency
