Nisupak ang mga business groups sa Sugbo sa gisugyot nga 25 porsyentong pagtaas sa domestic cargo fees, tungod sa kabalaka nga mahimong mosaka ang logistics costs ug mosunod niini ang presyo sa mga produkto.
Tumong sa Cebu Chamber of Commerce and Industry kun CCCI ug Mandaue Chamber of Commerce and Industry kun MCCI ang panginahanglan nga magpabiling pinansyal nga lig-on ang operasyon sa pantalan, apan ilang gihangyo nga dili sa ipatuman ang maong pagtaas.
Girekomendar sa CCCI nga ilahi una sa Cebu Port Authority kun CPA ang implementasyon samtang himuon ang mas lawom nga pagrepaso sa proposal, ug kung ipadayon man kini, ang adjustment kinahanglan makatarunganon, proporsyonal, transparent ug mas maayong ipatuman sa hinay-hinay nga paagi.
Gipasidaan ni MCCI President Barbara Gothong-Tan nga importante ang domestic cargo handling sa ekonomiya sa Sugbo tungod sa dakong pagsalig sa inter-island freight ug roll-on/roll-off shipping alang sa paglihok sa mga produkto.
Gitan-aw sa MCCI nga ang mas taas nga logistics costs mahimong modugang sa presyo sa mga baligya ug sa gasto sa operasyon sa mga negosyo, ilabina karon nga nag-atubang ang mga kompanya sa mas hinay nga demand, mas taas nga operating expenses, sweldo ug fuel prices.
Gihangyo usab sa grupo ang CPA nga susihon kung tukma ba gyud ang panahon alang sa maong adjustment, ilabina human mitubo lamang og 2.3 porsyento ang Philippine economy sa ikaduhang quarter sa 2026 ug nag-atubang pa sa posibleng epekto sa El Niño.
Giklaro sa CPA nga wala pa kini mohimo og pinal nga desisyon sa gisugyot nga tariff adjustment nga gihangyo sa Port of Cebu Association of Cargo Handling Operators, Inc. kun ang PCACHOI tungod sa pagsaka sa operating costs, inflation, sweldo ug pag-usab-usab sa presyo sa gasolina.
Nagpahigayon na ang CPA og public consultation niadtong Agosto 14, 2026 aron madungog ang mga opinyon sa mga stakeholders, samtang nagpadayon ang panaghisgot alang sa usa ka balanse nga polisiya nga makapadayon sa kalig-on sa operasyon sa pantalan nga dili sobra nga makapabug-at sa mga negosyo ug konsumidor.
Photo courtesy: The Maritime Review
