Gipasalig sa Lokal nga Kagamhanan sa General Santos City nga dili pasagdan ug padayon nga hatagan og dakong pagtagad ang mga mangingisda ug mag-uuma sa selebrasyon sa Tuna Festival 2026.
Gipahayag ni Tuna Festival Director Joey John Elman Concepcion nga nakig-alayon ang LGU, pinaagi sa City Social Welfare and Development Office (CSWDO) ug sa mga programa sa administrasyon ni Mayor Lorelie Pacquiao, alang sa paghatag og tabang sa mga fisherfolk ug mag-uuma.
Lakip sa mga gihimong lakang mao ang Emergency Cash Transfer ug uban pang mga programa nga gitumong sa mga sektor nga naapektuhan sa mga nangaging kalamidad, lakip ang linog, ingon man sa pagsaka sa presyo sa krudo ug lana.
Matud ni Concepcion, importante alang sa lokal nga kagamhanan nga masiguro nga walay sektor nga mabiyaan ilabina ang mga mangingisda, mga trabahante sa industriya sa tuna, ug mga mag-uuma nga dako og kontribusyon sa ekonomiya sa dakbayan.
Gipasiugda usab niini nga adunay gitakdang Fisherfolk’s Day ug Farmers’ Day isip pag-ila ug pagpasalamat sa maong mga sektor. Gawas niini, ipahigayon usab ang Handline Summit ug uban pang mga kalihokan alang sa mga mangingisda ug mga trabahante sa tuna industry isip kabahin sa selebrasyon.
Gihangyo ni Concepcion ang mga mangingisda ug trabahante nga siguruhon nga nakarehistro ug nakatala ang ilang mga ngalan sa CSWDO aron masiguro ang ilang pagdawat sa mga benepisyo ug hinabang nga gitanyag sa lokal nga kagamhanan.
Pinaagi sa maong mga programa, gipakita sa General Santos City ang pag-ila ug pagpasalamat sa mga mangingisda ug mag-uuma nga giila nga mga “unsung heroes” sa dakbayan ug dakong bahin sa pagpalig-on sa General Santos isip Tuna Capital of the Philippines.
