Nahimong sentro sa atensyon ang Australian performance artist nga si Stelarc, tungod sa iyang talagsaong proyekto nga gitawag og “Ear on Arm,” diin gipahimo niya og porma sa dalunggan ang iyang bukton.
Kapin usa ka dekada ug tulo ka plastic surgeons ang giingong nalambigit sa pagpalambo sa maong proyekto. Gigamit ang mga materyales sama sa saline solution ug silicon implant aron maporma ang ikatulong dalunggan.
Dili lamang kini gituyo isip artistic display kay gisulayan usab kini og butangan og gamay nga mikropono aron makapadala og tingog. Temporaryo kining gitangtang tungod sa impeksyon, apan plano ni Stelarc nga ipadayon pa ang proyekto.
Kung makompleto, gusto niya nga mahimong usa ka matang sa remote listening device ang dalunggan nga konektado sa internet aron ang ubang tawo makapaminaw sa mga tingog nga madungog niini.
Ang maong proyekto nahimong usa sa labing talagsaong pananglitan sa kombinasyon sa art, teknolohiya ug lawas sa tawo.
Photo Courtesy: CNN
