Miuyon sa ikatulo ug katapusang pagbasa ang Cebu Provincial Board sa proposed 2026 Children’s Code sa Probinsya sa Sugbo atol sa regular session niadtong nakalabayng adlaw, isip kabahin sa pagpaningkamot sa probinsya nga mapalig-on ang sistema sa pagpanalipod sa mga kabataan.
Tumong sa maong ordinansa, nga gipangulohan ni Sangguniang Panlalawigan Board Member Lakambini “Neneth” Reluya, ang paghimo og komprehensibong polisiya alang sa pagpanalipod ug pagpalambo sa katungod, kaayohan ug hustong paglambo sa matag bata sa probinsya.
Dugang pa kini ang katungod sa mga kabataan sa survival, development, protection ug participation, lakip ang mas hugot nga mga lakang batok sa abuso, pagpasagad, pagpahimulos, trafficking, child labor, diskriminasyon ug online abuse.
Gikatakda usab sa Children’s Code ang mga responsibilidad sa mga ginikanan, komunidad, eskwelahan, lokal nga kagamhanan ug uban pang stakeholders sa pagmugna og luwas, inklusibo ug child-friendly nga palibot alang sa mga kabataan.
Palig-unon usab sa ordinansa ang mga mekanismo sa pagreport ug case management, suporta alang sa mga batang nanginahanglan og espesyal nga proteksyon, ug mga programa ubos sa juvenile justice and welfare system.
Pinaagi sa maong polisiya, gitinguha nga ang pinakamaayong interes sa bata mahimong giya sa tanang programa ug serbisyo alang sa kabataan sa tibuok probinsya sa Sugbo.
Sa higayon nga mahimong balaod ang ordinansa, magsilbi kini isip hiniusang polisiya nga mahimong basihan sa pagpatuman sa mga programa ug serbisyo alang sa child protection sa tanang bahin sa Probinsya sa Sugbo.
Photo courtesy: Cebu Province
