Nahimong sentro sa atensyon ang usa ka Orangutan, nga balik-balik nga nakuha og mga balde gikan sa mga balay ug bodega duol sa usa ka protected area, apan dili diay alang sa pagpangawat kondili aron magdala og tubig ngadto sa uga nga katubigan nga kaniadto kabahin sa iyang puy-anan.
Una nang nakurat ang mga residente tungod sa kanunay nga pagkawala sa ilang mga balde. Apan human gisubay sa mga otoridad ang lihok sa orangutan, nakit-an ang mga balde nga nagkatag duol sa uga nga bahin sa yuta.
Sumala pa, kaniadto gigamit sa mga Orangutan ang maong lugar isip watering area, apan nauga kini paglabay sa panahon. Nasaksihan usab sa mga camera nga nagkuha ang orangutan og balde, magkuha og tubig sa duol nga atabay ug dad-on kini ngadto sa uga nga lugar aron ibubo. Gibalik-balik niya kini sulod sa duha hangtod tulo ka adlaw.
Bisan dili niini hingpit nga mapuno pag-usab ang maong katubigan, nakapukaw gihapon kini sa pagbati sa mga nakasaksi tungod sa daw talagsaong paningkamot sa mananap nga mobalik sa lugar nga kaniadto bahin sa iyang puy-anan.
Tungod niini, gibutangan og mga babag ug ganghaan ang pipila ka lugar aron mapugngan ang orangutan sa pagkuha sa mga balde sa mga residente.
Photo Courtesy: Instagram
