Gisusi na sa CDRRMO Digos ang bangag nga nakita sa tunga sa dalan sa San Antonio Village, Roxas Extension, Barangay Zone II, Digos City, human kini gireport ni Barangay Kapitan Douglas Arrogante.
Matud ni Philip June Caminade, EMT, Chief Operations and Warnings sa CDRRMO Digos, dili pa sila makaingon kung sinkhole ba kini o dili, ug kinahanglan pa kining masusi sa specialist.
Sa pagkakaron, gikurdonan ang lugar ug gidid-an sa pag-agi ang mga heavy vehicle, samtang gitambagan ang mga residente nga bantayan kung modako pa ba ang bangag. Ang bangag anaa mismo sa tunga sa dalan ug gibanabanang taga-hawak sa tawo ang giladmon, hinungdan nga hulaton una ang pagsusi sa specialist.
Gipahinumdoman usab ang publiko nga dili maratol sa mga post nga mikaylap online ug dili dayon motuo sa dili beripikadong impormasyon. Padayon nga gibantayan sa CDRRMO Digos ang lugar samtang gihulat ang specialist aron matino ang hinungdan sa pagkabuo sa maong bangag.
