Dili tinuod ang mikaylap sa social media nga posibleng maguba ang pipila ka dam, sa nasud tungod sa sunod-sunod nga kusog nga pag-ulan, sumala sa National Irrigation Administration (NIA).
Giklaro ni NIA Administrator Eduardo Guillen nga walay basehan ang maong impormasyon, ilabina sa Magat ug Pantabangan Dam, nga kapin 50 ka tuig nang nakaagwanta sa nagkalain-laing kondisyon sa panahon.
Matud sa NIA, regular nga gisusi ang kalig-on sa mga dam, lakip ang maintenance ug operasyon niini aron malikayan ang posibleng peligro.
Gigamit usab sa ahensya ang Artificial Intelligence sa pagbanabana sa panahon, nga makatabang sa sayong paghibalo sa gidaghanon sa ulan ug pagpagawas daan sa tubig kon gikinahanglan. Gipasabot sa NIA nga nagpabiling luwas ug hugot nga gibantayan ang mga dam.
Photo Courtesy: PNA
