Narekober sang mga otoridad ang ginabulubanta nga 22 gramos sang shabu nga nagabalor sang P149, 600.00, kaupod ang isa ka unlicensed nga armas luthang, sa ginpatigayon nga search warrant operation sa Barangay Sagasa, Esperanza, Sultan Kudarat,sang Agosto 20, 2026.
Ginpatigayon ang nasambit nga operasyon pinaagi sang Esperanza Municipal Police Station, 2nd Sultan Kudarat Provincial Mobile Force Company, kag iban pa nga units sang kapulisan kag Philippine Drug Enforcement Agency.
Nadakpan sa operasyon ang ginkilala lamang sa alyas nga “Tweng,” isa ka high-value individual kag residente sang nasambit nga lugar.
Nakumpska sang mga operatiba ang pito ka sachet sang ginabulubanta nga shabu, isa ka .38 caliber revolver nga wala sing serial number kag may anom nga bala—tatlo diri ang live ammunition.
Narekober man ang mga sling bag, lighter, improvised drug paraphernalia, aluminum foil, mga empty sachet, gunting kag improvised glass tube tooter.
Sa pagkakaron, ginkustodiya sang Esperanza MPS ang suspek, samtang ginpadala na sa forensic unit ang ginapatihan nga shabu para sa laboratory examination.
Ginapreparar ang kaso batok sa suspek bangud sa paglapas sa Sections 11 kag 12 sang Republic Act 9165, kag Republic Act 10591 ukon ang balaod sa firearms kag ammunition.
Photo Courtesy: PNP Police Regional Office 12
