Gihagit sa Department of the Interior and Local Government (DILG) Zamboanga del Sur ang mga local government units (LGUs) nga ipabilin ang pagsunod sa mga parameter sa assessment sa Persons with Disability Affairs Office (PDAO).
Matud ni DILG Zamboanga del Sur Provincial Director Dave M. Barrot kinahanglan nga mao kini ang buhaton sa mga LGUs ug dili lang sa panahon nga adunay evaluation aron mahatag ang saktong pagtagad alang sa mga PWDs.
Segun ni Barrot, labing mahinungdanon usab nga mabati sa sektor sa mga PWDs ang hapsay ug epektibo ang operasyon sa PDAO, ilabina sa paghatag og serbisyo, programa ug suporta alang kanila.
Gipasiugda usab niya nga importante ang padayong pag-monitor ug pag-assess sa mga PDAO aron masukod ang ilang performance nga kinahanglan pa og dugang nga pagpalambo.
Pinaagi matud pa niini, mahimo nga mapalig-on sa mga LGU ang ilang mga programa alang sa PWDs ug masiguro nga mahatagan sila og angay ug patas nga serbisyo gikan sa mga LGUs.
