Nasikop sa mga kapulisan sa San Isidro Municipal Police Station ang Top 5 Most Wanted Person sa kasong rape. Gikasa ang operation bitbit ang warrant of arrest batok sa suspek nga 31-anyos, ulitawo, walay trabaho ug residente sa Barangay Ombong, Alegria, Surigao del Norte.
Ang suspek nadakpan pasado alas-1:15 sa hapon sa Purok 4, Barangay Del Carmen, San Isidro. Ang warrant of arrest gipagawas sa Regional Trial Court, 10th Judicial Region, Branch 30, Surigao City niadtong Abril 28, 2026 kasong Rape in relation to Republic Act 7610, ubos sa Criminal Case No. 19097, diin walay piyansa nga gitugot ang korte.
Madomdoman nga nahitabo ang insidente niadtong Oktubre 22, 2023 sa Barangay Ombong, Alegria. Ang biktima usa ka 18-anyos nga babaye, usa ka person with disability ug estudyante.
Giingong silingan sa biktima ang akusado ug giakusahan nga mipugos sa pagdala kaniya ngadto sa usa ka abandonadong lugar ug didto gihimo ang niluog nga pagpangabuso.
