Gikondena ni Senador Robin Padilla ang sa insidente sa pagpamusil sa eskwelahan nga nahitabo sa Ateneo de Zamboanga Junior High School niadtong buntag sa Martes, Agosto 18, 2026. Ang insidente naglambigit sa usa ka estudyante sa Grade 7 nga gituohang namusil sulod sa classroom sa maong tunghaan, nga miresulta sa kamatayon sa laing estudyante ug sa suspek mismo.
Atol sa usa ka Facebook Live broadcast niadtong Martes, gitudlo ni Padilla ang social media isip usa sa mga nag-unang hinungdan nga nag-impluwensya sa mga kabatan-onan sa paghimo og mga buhat sa kapintasan ug mga ngil-ad nga krimen. Gipasiugda niya nga dugay na niyang gihisgutan ang dakong epekto sa social media ngadto sa mga bata atol sa mga hearing sa Senate Committee on Public Information and Mass Media, diin siya ang tsirman apan nakadawat hinuon siya og pagsaway gikan sa publiko tungod sa iyang baruganan.
Nagpahayag og paglaum si Padilla nga masabtan sa publiko ang iyang punto bahin sa makapabalaka ug makalilisang nga kinaiya sa kapintasan nga naggikan karon sa mga kabatan-onan. Giklaro niya nga nagsulti siya base sa iyang kasinatian ug kahibalo, sanglit nakasaksi na siya kaniadto og susamang mga kaso sa kapintasan samtang nabilanggo siya sa Bilibid.
Gihingusgan si Padilla nga kinahanglan magpanday ang Pilipinas og balaod susama sa anaa sa ubang mga progresibong nasod nga nagdili sa mga batan-on sa paggamit og social media. Tungod niini, nanawagan siya sa publiko alang sa suporta sa pagduso og balaodnon nga maglimiti sa paggamit sa mga bata sa social media.
Gipasiugda ni Padilla nga dili na sila mahimong magpaka-buta-bungol ug motugot nga mahitabo pag-usab ang kapintasan nga naglambigit sa usa ka bata, samtang nagpadayon nga walay hunong ang mga pagsaway ug pamolitika bahin niining mga isyu.
Photo Courtesy: Philippine News Agency
