Nagpadayon ang imbestigasyon sa Digos City Police Station sa kaso sa pagpatay kang kanhi Kapitan Dodong Bucol Jr., bisan 8 ka bulan ug 21 ka adlaw na ang milabay sukad sa insidente. Matud ni PLtCol Norman Yparraguirre, Chief of Police sa Digos City Police Station, nagpadayon ang pagsusi sa mga bag-ong impormasyon nga ilang nadawat aron mas mapalig-on ang imbestigasyon sa kaso.
Gihangyo usab niya ang adunay nahibal-an nga personal nga moduol sa kapulisan aron masusi sa hustong paagi ang ilang impormasyon, imbes nga idiretso kini sa social media.
Kalabot sa sakyanang ilang nasubay pinaagi sa CIDG ug HPG, nakumpirmang nakagawas kini sa Davao City, hinungdan nga mas gitutokan karon sa kapulisan ang mga personahe nga posibleng adunay nahibal-an sa kaso.
Giklaro usab sa kapulisan nga dili nila dalion ang pagpasaka og kaso hangtod dili igo ug lig-on ang ebidensya nga ilang makuha. Aduna na usab silay gitutokan nga pipila ka personahe nga posibleng makatabang sa pagtino sa gunman, mga lookout ug kung adunay mastermind sa krimen.
Alang sa pamilya ni Bucol, nangayo ang Digos City Police Station og dugang pasensya ug pagsabot, samtang gipasalig nga wala nila pasagdi ang kaso ug padayon ang imbestigasyon aron matino ang mga responsable sa krimen.
Gipasalig sa Digos City Police Station nga padayon nilang tutukan ang kaso, samtang gihangyo ang publiko nga adunay nahibal-an nga impormasyon nga makigtambayayong sa kapulisan aron makatabang sa imbestigasyon.
Photo Courtesy: Instagram
