Gikasal ang 17 ka paresan sa BJMP General Santos Male Dormitory pinaagi sa programang “Kasalan ng Piitan 2026” niadtong Agosto 18, 2026. Sa maong ihap, 14 ka paresan ang gikasal pinaagi sa civil wedding nga gi-officiate mismo ni General Santos City Mayor Lorelie Pacquiao, samtang tulo ka paresan ang gikasal pinaagi sa seremonyang Islam.
Dungan nga nanumpa og “I do” ang mga pares, nagsul-ob og singsing ug naghalok isip timaan sa ilang panaghiusa ug legal nga pagminyo. Alang sa mga Muslim nga pares, gihimo usab ang mga ritwal nga gikinahanglan sa ilang pagtuo alang sa pagkasal.
Human sa seremonya, gihatagan ni Mayor Pacquiao ang matag magtiayon og 25 kilos nga bugas ug gamay nga cash gift isip espesyal nga regalo.
Nahimong mabulukon ug makahuluganon ang maong kalihokan diin gihatagan og higayon ang mga persons deprived of liberty o PDLs nga masinati ang usa ka espesyal nga seremonya sa ilang kaminyoon uban sa ilang mga kapikas.
Gipadayag usab ni Mayor Pacquiao nga libre ang tanang gasto alang sa maong kasal. Matud pa niya, andam siyang mas mapa-nindot pa ang programa sa umaabot, lakip ang posibilidad nga mo-donar og catering services alang sa mga sunod nga seremonya.
Samtang, mipahayag og dakong pasalamat si JSUPT Joe Anthony Gargarita sa tanang nakatabang aron mahimong malampuson ang maong kalihokan.
Matud ni Gargarita, gipakita sa “Kasalan ng Piitan 2026” nga dili mahimong babag ang taas nga mga paril sa prisohan aron makab-ot sa tinuod nga gugma ang legal nga panaghiusa.
Dugang pa niya, isip kabahin sa programa, hatagan ang matag magtiayon og usa ka oras nga conjugal rights isip ilang honeymoon. Tumong sa maong programa nga mapalig-on ang relasyon sa mga PDLs ug sa ilang mga kapikas, samtang gihatagan sila og higayon nga mahimong legal ang ilang panag-uban bisan pa man sa kahimtang nga ilang giatubang.
