Gipadayon sa administrasyong Marcos ang pagpalapad sa mga scholarship ug educational assistance sa tibuok nasud aron mas daghang Pilipino ang makapadayon ug makagradwar sa kolehiyo.
Gipasalig ni Executive Secretary Ralph Recto sa mga presidential scholar sa iyang pagbisita sa Cebu nga dili angay mahimong babag ang kakulang sa pinansyal aron maputol ang pag-eskwela sa mga estudyante.
Ubos sa Bagong Pilipinas Barangay Presidential Scholars Program, lima ka fourth-year college students sa matag barangay ang makadawat og P20,000 nga financial assistance.
Niining tuiga, gilauman nga mokabat sa 210,000 ka estudyante gikan sa kapin 42,000 ka barangay sa tibuok nasud ang makabenepisyo sa programa.
Matod ni Recto, kabahin kini sa mas lapad nga paningkamot sa gobyerno nga mapalapad ang access sa edukasyon, lakip ang libreng basic education, tuition sa state universities and colleges, ug nagkalain-laing scholarship programs.
Giawhag usab ni Recto ang mga scholar nga maningkamot sa ilang pagtuon, tapuson ang ilang kurso ug gamiton ang ilang nakat-unan aron makatabang usab sa ilang pamilya ug komunidad.
Photo Courtesy: Philippine Information Agency
