Gihangyo sa hawanan sa Konseho atol sa regular session kagahapong adlawa nga mahatag na sa mga uniformed personnel sama sa Task Force Oro, COCPO, BFP ug uban pa ang pila ka bulan nga delayed allowances kon subsidy nga maggikan sa City Government sa Cagayan de Oro.
Kini gipaabot ni Konsehal Yvy Emano ngadto sa iyang mga kaubanang Konsehal pinaagi sa iyahang special report lakip ang pangutana unsa ka importante o prayoridad sa syudad ang hisgutanang peace and order.
Saysay sa Konsehal, sukad 2023, duha na ka ordinansa ang napanday sa syudad aron nga masigurong adunay pondo nga mokabat sa P3 millon kada tuig alang sa allowances sa mga uniformed personnel, apan adunay kapakyasan sa pagpatuman sa ordinansa tungod halos unom ka bulan na ang delayed sa pagrelease sa allowances.
Alang kang Emano, dili pwede nga ang syudad lang ang perming nagapangayo og tabang o suporta sa nahisgutang mga ahensya aron nga mobantay sa seguridad sa syudad, labi na karon nga daghan ang mga aktibidad sa syudad tungod sa pagsaulog sa Higalaay Festival.
Busa angayan sab nga sakto ang madawatang suporta sa mga uniformed personnel tungod obligasyon man kini sa syudad nga dili na angay pang langay-langayon.
Photo courtesy: Cagayan de Oro City Council
