Gipahibalo sa City Government of Tandag ang pagpatuman sa Executive Order No. 32, Series of 2026, nga temporaryong nagsuspinde sa mga outdoor activities, lakip ang mga kalihokan nga gihimo sa alfresco settings, gikan alas-9:00 sa buntag hangtod alas-4:00 sa hapon kada adlaw tungod sa nagpadayong taas nga heat index sa siyudad.
Sumala sa public advisory nga gipagawas karong adlawa, Agosto 13, 2026, gitumong ang maong lakang sa pagpanalipod sa kahimsog ug kaluwasan sa katawhan batok sa peligro nga dala sa grabeng kainit.
Lakip sa mga kalihokan nga sakop sa temporaryong suspension ang sports, fun runs ug mga strenuous physical activities; outdoor school ug youth activities; festivals, street dancing ug cultural activities; outdoor activities sa gobyerno ug barangay; outdoor religious gatherings ug processions; outdoor commercial ug promotional activities; ug uban pang kalihokan nga mahimong magresulta sa dugay nga exposure sa sobra nga kainit.
Gidasig ang mga organizer ug concerned offices nga i-reschedule ang ilang mga kalihokan sa dili pa alas-9:00 sa buntag o human alas-4:00 sa hapon, basta luwas ang heat conditions. Mahimo usab nga ibalhin ang kalihokan ngadto sa indoor o adequately cooled nga lugar, i-postpone kung gikinahanglan, o usbon ang pamaagi aron maminusan ang exposure sa grabeng kainit.
Apan wala sakopa sa suspension ang mga essential ug urgent operations, sama sa emergency response, rescue ug evacuation; emergency medical ug health services; firefighting; law enforcement, traffic ug public safety operations; essential utilities ug critical infrastructure; ug mga kalihokan nga gikinahanglan aron matubag ang mga hulga sa kinabuhi, kahimsog, kabtangan o kaluwasan sa publiko.
Bisan pa man niini, gipahinumdoman nga ang mga exempted nga operasyon kinahanglan gihapon mosunod sa heat-safety measures, lakip ang hustong hydration, work-rest cycles, shaded o cooled rest areas, paggamit sa angay nga protective equipment ug paglimit sa exposure sa kainit kung mahimo.
Gipahinumdoman usab ang publiko nga ang suspension period nga alas-9:00 sa buntag hangtod alas-4:00 sa hapon epektibo kada adlaw hangtod nga usbon o i-lift ang maong polisiya base sa kahimtang sa heat index.
Samtang, gipatin-aw sa advisory nga temporaryong gisuspendi ang naunang 9:00 A.M. hangtod 4:00 P.M. restriction sa operating hours sa air-conditioning units. Busa, mahimong magamit ang air-conditioning sulod sa maong oras, ilabina aron makatabang sa pagpanalipod batok sa grabeng kainit. Apan nagpabilin nga epektibo ang tanang ubang energy-efficiency ug energy-conservation measures nga gipatuman sa siyudad.
Gidasig ang mga residente nga magmatngon, magpabiling hydrated, likayan ang dugay nga exposure sa direktang adlaw ug likayan ang sobra nga pisikal nga kalihokan panahon sa peak heat hours.
Ang maong lakang kabahin sa mga protective measures sa City Government of Tandag aron mapamenos ang risgo sa heat-related illnesses samtang nagpadayon ang taas nga heat index sa siyudad.
