Nanguna ang mga ginikanan sa mga tinun-an sa Nicomedes Tolentino Elementary School (NTES) sa Brgy. Poblacion, Malapatan , Sarangani Province sa bayanihan aron matubag ang panginahanglan sa dugang nga learning spaces sa ilang eskwelahan.
Nag-donate ang mga ginikanan og kawayan, nipa ug uban pang lokal nga materyales nga gigamit sa pagtukod sa temporaryong mga classroom sulod sa eskwelahan. Dili lamang materyales ang ilang gihatag, kundili mitabang usab sila mismo sa pagtukod sa mga temporaryong istruktura.
Pinaagi sa ilang panaghiusa ug boluntaryong pagtrabaho, nadugangan ang mga lugar nga magamit sa mga tinun-an samtang gihulat ang mas permanente nga solusyon sa kakulang sa classroom.
Gipakita sa maong inisyatiba ang espiritu sa bayanihan, diin ang mga ginikanan ug komunidad nagtinabangay aron masiguro ang padayong pagkat-on sa mga bata. Bisan temporaryo lamang ang mga classroom, nahimong konkretong tabang kini sa mga tinun-an ug sa tibuok komunidad sa NTES.
Photo Courtesy: DEPED Sarangani
