Andam ang Department of Trade and Industry-Northern Mindanao o DTI X sa pagpatuman og mga programa alang sa mga gagmayng negosyante nga naapektuhan sa pagsaka sa presyo sa mga palaliton.
Matod ni Julie Nieva-Costales, Information Officer sa DTI X, daghang MSMEs ang nakasinati og pagkunhod sa kita, samtang ang uban napugos sa pagsira sa ilang negosyo tungod sa nagkataas nga gasto sa operasyon.
Aron matabangan sila nga makabangon, naghatag ang DTI og nagkalain-laing interventions, lakip ang access sa mga loan program aron marecover ang operasyon ug makabalik sa pagnegosyo.
Nagpatuman usab ang ahensya og mga seminar ug training bahin sa financing, business operations ug uban pang kahibalo nga makatabang sa mga negosyante.
Tumong sa DTI nga mapalig-on ang MSMEs aron mas makasugakod sila sa mga hagit sa pagnegosyo, ilabina sa panahon sa pagsaka sa presyo sa mga palaliton.
Kahibaloang sa bag-uhay lang nga gireport sa Philippine Statistics Authority kon PSA Region X nga adunay gamay nga pagkunhod sa inflation rate kon pagsaka sa preyso sa mga palaliton sa rehiyon ngadto na sa 6.4% sa bulan sa Hulyo. Tuod, taas pa gihapon kini apan nasulod pa sa target-range sa Bangko Sentral ng Pilipinas.
Photo courtesy: DTI X/ Facebook
