Balhog na sa prisohan ang usa ka Top 10 Provincial Most Wanted Person human nadakpan sa mga otoridad atol sa gikasang operasyon sa Cateel, Davao Oriental, pasado alas 7:30 sa gabii niadtong Agosto 10, 2026.
Ang operasyon gihimo sa mga personae sa Cateel Municipal Police Station, ubos sa pagpanguna ni PMAJ Michael P. Celecio, Chief of Police, uban sa mga personnel sa Criminal Investigation and Detection Group Davao Oriental Provincial Field Unit (CIDG DORPFU), Police Intelligence Unit DOPPO ug 1st Davao Oriental Provincial Mobile Force Company (DOPMFC).
Ang suspek nga nadakpan nailhan sa alyas “Al,” 35 anyos, adunay live-in partner, usa ka mag-uuma ug residente sa Sitio Danog, Barangay Mainit sa maong munisipyo.
Nasikop ang suspetsado pinaagi sa pagpatuman sa warrant of arrest alang sa kasong homicide nga adunay pyansang girekomendar ang korte nga mokabat sa ₱120,000.00 alang sa iyang temporaryong kagawasan.
Sa panahon sa pagdakop, gipahibalo sa kapulisan ang suspek sa iyang mga katungod subay sa balaod ug sa pinulongan nga iyang nasabtan ayha paman gidala sa kustodiya sa Cateel Municipal Police Station alang sa tukmang disposisyon.
Photo Courtesy:Cateel MPS
