Gikataho sa Deutsche Welle nga base sa usa ka bag-ong pagtuon nga ang pagbag-o sa klima ug pagsaka sa temperatura mahimong makausab sa mga lugar nga paborable sa pagkuyanap sa malaria sa Africa.
Kahibaloan nga ang malaria kasagarang mapasa pinaagi sa pinaakan sa babaye nga lamok nga Anopheles, diin sumala sa pagtuon, labing episyente ang pagtakod sa malaria kung ang temperatura anaa sa palibot sa 25°C, samtang mokunhod pag-ayo ang posibilidad sa pagtakod niini kung moubos sa 16°C o mosaka labaw sa 34°C.
Sumala pa sa World Health Organization (WHO), ang Africa naglangkob sa dakong bahin sa global malaria burden nga mokabat sa mga 95% sa tanang kaso ug kamatayon tungod sa malaria sa tibuok kalibotan. Lakip sa mga nasod nga adunay pinakataas nga bahin sa mga kamatayon tungod sa malaria mao ang Nigeria, Democratic Republic of the Congo, ug Niger.
Matod pa ni Olugbenga Mokolu, propesor sa pediatrics sa University of Ilorin sa Nigeria nga dili lamang klima ang hinungdan sa pagkaylap sa malaria maong gikinahanglan ang mga programa batok niini.
Tungod niini, nagrekomendar ang WHO sa mas lapad nga paggamit sa RTS, S/AS01 malaria vaccine alang sa mga bata nga anaa sa mga lugar nga adunay kasarangan o taas nga lebel sa transmission sa Plasmodium falciparum.
Photo Courtesy: Greenpeace
