Padayon nga nagpahimutang sa tribal hall ang mga pamilyang naapektuhan sa sunog nga nahitabo niadtong Domingo, Agosto 9, 2026, sa Purok 3, Barangay Mainit, Nabunturan, Davao de Oro.
Sumala sa mga residente nga nahinabi sa Juander Radyo News Team, walo ka balay ang naugdaw sa maong insidente, hinungdan sa dakong kalisdanan sa mga pamilyang naapektuhan.
Gipadayag usab ni Marlo Cayabo, Barangay Health Coordinator sa maong lugar, nga nakadawat siya og tawag bahin sa sunog nga nahitabo sa likod mismo sa barangay hall. Nabalaka sila tungod kay pipila lamang ka metros ang gilay-on sa kalayo ug posibleng maapil usab ang barangay hall kung mokatag pa ang sunog.
Dugang ni Cayabo, dali usab nga mitubag ang provincial ug lokal nga panggamhanan sa Nabunturan pinaagi sa paghatag og tabang sa mga naapektuhan aron mapagaan ang ilang nasinatian nga kalisdanan.
Gidasig usab niya ang mga biktima nga dili mawad-an og paglaom tungod kay andam ang panggamhanan sa pagtabang ug paghatag sa ilang mga panginahanglan.
Padayon usab ang pahimangno sa mga otoridad sa publiko nga mag-amping ug magmatngon aron malikayan ang susamang insidente sa sunog.
