Gipasigarbo sa beteranang aktres nga si Lorna Tolentino ang iyang bag-ong papel isip Philippine Navy Reservist. Iyang gipaambit sa social media ang mga hulagway sa iyang gradwasyon diin makita siyang nagsul-ob sa uniporme sa Philippine Navy niadtong Agosto 7 sa Taguig City.
Mitambong usab sa maong espesyal nga higayon ang iyang anak nga si Rap Fernandez uban sa pipila nilang suod nga mga kapamilya ug higala. Sa iyang mensahe, gipasiugda ni Tolentino ang importansya sa disiplina ug pagpadayon bisan pa man sa kalisod sa mga pagsulay nga iyang giagian atol sa pagbansay.
Lakip sa iyang naagian ang military training sa Cavite, diin nasinati usab niya ang pisikal nga kakapoy ug pagkasamad samtang nakigbahin sa mga kalihokan nga may kalabotan sa pagbansay sa tubig.
Bisan pa niini, nakapadayon siya hangtod sa pagkahuman sa training ug sa iyang pormal nga pagpasulod isip reservist. Nagdagsa usab ang mga pahalipay gikan sa iyang mga kauban sa industriya sa showbiz ug mga suod nga higala.
Lakip sa ubang nailhang personalidad nga nagsilbi isip Philippine Navy Reservists mao sila Christopher De Leon, Dingdong Dantes, Rocco Nacino, Winwyn Marquez ug uban pa.
Photo Courtesy: Philippine Navy
