Giaprobahan sa 21st City Council, ang usa ka ordinansa nga nagtugot kang City Mayor Rolando A. Uy sa pagpirma og usa ka tuig nga lease contract uban sa Mendero Medical Holding Group Corporation alang sa 495-square-meter nga luna sa Hemodialysis Unit sulod sa J.R. Borja General Hospital (JRBGH). Tumong niini nga mapalapad ang serbisyo sa dialysis ug mapauswag ang access sa healthcare alang sa mga residente sa dakbayan.
Ang hemodialysis unit SA JRBGH, nga lisensyado sa Department of Health, nagtubag sa panginahanglan sa mga pasyenteng adunay kidney failure. Apan tungod sa limitadong resources, limitado usab ang kapasidad niini.
Ginalantaw nga ang partnership maghatag og mas accessible nga dialysis facility, dugang nga expertise, kagamitan ug operational support aron mapadayon ang dekalidad nga serbisyo sa mga pasyente.
Apan, atol sa regular session, nangayo si Councilor Yevonna Yacine B. Emano og update bahin sa kasamtangang operasyon sa hemodialysis center ug nangutana bahin sa pagdumala ug kapasidad niini.
Gipatin-aw ni Councilor Paolo Nicolo Gaane nga nahuman na ang kontrata sa kanhing pribadong lessee nga nag-operate og 12 ka dialysis units. Ang bag-ong lessee, nga mipuli niini, nagpalapad sa pasilidad ngadto sa 15 ka units, uban ang modernong kagamitan ug kompletong manpower. Human sa taas nga diskusyon ug mga pangutana, giaprobahan sa konseho ang ordinansa, samtang nag-abstain si Councilor Imee Rose Moreno.
Photo courtesy: Cagayan de Oro City Council
