Nadakpan ang usa ka giila nga high-value target sa illegal nga droga atol sa hiniusang operasyon sa kapulisan ug mga ahensya sa pagpatuman sa balaod sa Purok Madasigon, Barangay Quezon, Tandag City, niadtong nakalabay nga adlaw.
Mga alas-1:30 sa kaadlawon dihang gipatuman sa mga operatiba sa Tandag City Component Police Station Drug Enforcement Unit, kauban ang SDSPPO Provincial Drug Enforcement Unit, PDEA Surigao del Sur, NBI Caraga, ug PNP RIU-13, ang Search Warrant isip kabahin sa OPLAN “THUNDER STRIKE ALFA.”
Ang target sa operasyon giila lamang sa alyas nga “DELTA,” nga gilista isip usa sa mga high-value target sa Tandag City tungod sa giingong kalambigitan sa illegal nga kalihokan sa droga.
Ang Search Warrant gi-isyu may kalabotan sa mga paglapas sa Republic Act 9165 o Comprehensive Dangerous Drugs Act of 2002 ug Republic Act 10591 o Comprehensive Firearms and Ammunition Regulation Act.
Nasakmit gikan sa operasyon ang gibanabanang 140 gramos nga gituohang shabu, nga adunay gibanabanang street value nga ₱950,000, drug paraphernalia, ug usa ka .22 caliber nga pistola.
Samtang ang tanang nakumpiskang ebidensya gi-inventory ug gimarkahan mismo sa lugar sa operasyon, atubangan sa mga saksi, subay sa hustong legal nga proseso.
Photo courtesy: Tandag City Component Police Station
